Больш за сто гадоў прайшло з тых часоў, калі славутыя сыны зямлі беларускай – Янка Купала і Якуб Колас - пакінулі нам у спадчыну запавет любіць і шанаваць нашу родную мову. З усёй адказнасцю можам сказаць, што іх запавет мы выконваем з гонарам.
У лістападзе ў ДУА “Сярэдняя школа №4 г. Рэчыцы” прайшоў тыдзень беларускай мовы і літаратуры, прысвечаны 130-годдзю з дня нараджэння нашых славутых песняроў прыгожага слова, слупоў беларускай літаратуры - Канстанціна Міхайлавіча Міцкевіча і Івана Дамінікавіча Луцэвіча. Настаўнікамі роднай мовы і літаратуры былі праведзены адкрытыя ўрокі і пазакласныя мерапрыемствы, прысвечаныя святкаванню гэтай значнай даты ў гісторыі нашай краіны.
У кантэксце мерапрыемстваў былі закрануты самыя разнастайныя бакі прыгажосці беларускага слова. Спачатку вучні далучыліся да чароўнага свята хрэсьбін, арганізаванага і праведзенага маладой настаўніцай Студзённікавай Кацярынай Юр’еўнай. Гледачы змаглі на свае вочы пабачыць, а галоўнае, зразумець загадкавую прыгажосць гэтага сямейнага свята, якое дае пуцёўку ў жыццё кожнаму з нас.
На працягу тыдня вучні змаглі праілюстраваць свае ўласныя адносіны да творчасці пісьменнікаў, прапанаваць уласнае сучаснае бачанне іх творчасці, аформіўшы насценыя газеты “Песняры роднай зямлі”.
Таксама ў вучняў была магчымасць прадэкламаваць са сцэны вершы слаўных паэтаў, паспаборнічаць за ўвагу слухачоў, прымаючы ўдзел у конкурсе выразнага чытання “Ад прадзедаў спакон вякоў…”. Вучні пранікліся душэўнымі словамі вопытнага педагога Осіпавай Галіны Іванаўны.
Увогуле, свята атрымалася: былі песні, танцы, запрошаныя вучні ўспаміналі жыццёвы і творчы шлях пісьменнікаў, чыталі вершы.
Вельмі прыемна назіраць, што нашы вучні не засталіся абыякавымі да ўслаўлення беларускага слова. Увесь тыдзень гучалі словы падзякі і віншавання ў гонар пісьменнікаў, бо і ў сённяшні дзень яны змаглі перанесці сваю любоў і павагу да нашага мілагучнага беларускага слова.
З вытокаў самабытных галасы
Зліваюцца ў адзін – народны голас:
Без Коласа ў Купалы менш красы,
А без Купалы пабяднее Колас. (М. Маляўка)
Настаўнік беларускай мовы і літаратуры
Студзеннікава Кацярына Юр’еўна.
